=-=-=-BertsoKatea-=-=-=

Mikel Laboa joan zaigu

bertsokatea — Mon, 01 Dec 2008 14:52:49 +0000

Aspaldiko partez negar
egin dut gaurko honetan,
sartu zeralako amets
betea den lo batetan.
Zuri eskerrak askotan
joan naiz hegan ametsetan
xorien eran kantuan
etsipenei ihesetan.
Kantuz sortu zinen eta
bizitza eman horretan,
kantuz agurtzen zaitugu,
kantuz negarrez penetan.
Zoaz lasai, zoaz Mikel,
egizu egan, benetan…
beti egongo baitzera
gu guztion bihotzetan.

Xagua

Bota bertsuba XV

bertsokatea — Sat, 29 Nov 2008 12:49:48 +0000

Etxabe duke jaunaren hilketa

bertsokatea — Sat, 22 Nov 2008 11:53:06 +0000

Bart Lizarrako Etxabe duke
jaunan jauregiyan bertan
dukea hilik aurkitu zuten
iluntzeko hamaiketan.
4 susmagarri aurkitu nitun
erdi negarrez penetan,
galdetu nien “dukea hiltzean
nun zeudeten eta zertan?”
Ta hurrenez hurren bakoitzak ala
aitortu zidan “benetan”:

Lehenik eta behin sukaldariyai
ipini niyon kontrola,
aitortu zidan une horretan
bera sukalden zegola.
Bera ez zela, bera ez zela,
nola egingo zula, nola?
Aitortu zidan 11ak alden
oihu bat entzun ta hola
garbitzen zegon plater dotore
bat erori zitzaiola.

Etxeko alabak zion irakurtzen
zegola pake pakian
ta berehala erreakzionatu
zula buila entzutian.
19 ta 20.go
orrialdien artian
markapaginas sartu zula ta
joan zela pixpax batian
eta lur jota geratu zala
jauna hilik ikustian.

Maiordomua omen zegoen
lagun batzukin batera,
bere soldata exkaxa jokauz
mahai bueltan pokerrera,
asko irabazten zegola ere
aitortu zidan gañera;
baina oihua entzun orduko
joan zela ikustera,
ah! Ta gainera orduan zula
koloreko eskalera.

Jardinerua hitz gutxikua,
lanak izan nitun hontan,
behin eta berriz galdetu niyon
zertan zegon ordu hortan
eta zergatik ez zen azaldu
zer zen ikusi asmotan.
Azkenik hala kontatu zidan
tonu altuan erronkan:
“ni ez naiz izan kanpoko nere
txabolan bainengon lotan”.

Zenbat ideia ta gogoeta
guztiei entzun ondoren,
bat izan dela pentsatu arren
ez dakit ziur nagoen;
beraz, laguntza eske joanda
jokatuko det ondoen.
Nahiz ta susmoak izan ez dakit
hiltzailea zein ote den,
zuek abilak zerate eta
lagun zaidazute arren…

Xagua detektibea

Iparraldeko bersulari xapelgoaren finaleko kronika

bertsokatea — Tue, 18 Nov 2008 00:09:44 +0000

Iparraldeko Bertsolari Txapelketa aurten jokatu da lehenengo aldiz. Iparraldeko Bertsularien Lagunak elkartea arduratu da antolaketaz eta urriaren 18an hasi eta herenegun bukatu zen. Amets Arzallus izan zen nagusi eta gure bertsokateko Ekhinobitxek ikaragarrizko saioa egin zuen. Dena dela, joan gaitezen urratses-urrats:

Motxian taldeko gazteok goizeko 8k eta hamarreko trena hartu eta Hendaiara abiatu giñen, aste bete lehenago egindako pankarta eta guzti.

Hara 10etarako ailegatu, polizia nazionalari DNia erakutsi eta pixka bat itxaron ondoren beste bertso eskoletako kideak agertzen joan ziren pixkanaka Hitzetik Hortzerako lan taldeakin batera. Artaldea osatutakoan Pierre Larzabal kolegioan lotako trastoak utzi eta poteora abiatu giñen Ziburura. Poteo goxo bat egin genuen Ziburu eta Donibane Lohitzuneko tabernetan barna Hooliganen eta nere bertso batzuekin eta trikitalarien eta trikitilari inprobisatuen pieza ederrekin lagunduta.

Ordubiak aldera; berriz, bazkaltzera joan giñen; zainzuriak, langostinoak eta txuleta; zorionak antolatzaileei eta sukaldariei!!!

4terdiak aldean pankarta txukun-txukun jarri eta zerbeza baten laguntzaz eta inguruko lagunekin berriketan jardunaz ohartzerako 8 bertsolariak oltza gainera igo zitzaizkigun. Ta holaxe, agurrekin bertsolariak eztarria berotzeaz aparte argi utzi zuten (Ekhinobitxek dotore asko bota bezela) bertsolaritzan festa bat zala herenegungo finala.

Zortziko handiko lana Maddalenek eta Sustraik hasi zuten euskarazko irratiaren inguruko saio serio bezain dotore batekin. Lan ederra egin zuten baita gure Ekhinobitxek eta Odei Barrosok; honako gaia jarri zioten “ama eskola bateko irakasleak dira, Odeik ez du arnasa hartzeko ere astirik ukaiten, Ekhiri aldiz lan eguna luzeegia zaio”. Hona bota zituzten bertso eder horietako ale bi:Odei:
Beraz ez naute inoiz entzuten,
ez al da aski tamala?
Umea baita harroa eta
ni naiz hain mutil apala.
Baina ez zaituzte gehiago maite,
ohar zaitez berehala;
beti tratatzen baitut nik haurra
nirea balitz bezala.

Ekhinobitx:
Zurea balitz bezala zabiltz,
bai baina galdua arrunt.
Aholkutxo bat al bada Odei
orain eman nahi dizut:
behar direnean ohiuak eta
baita zaplasteko batzuk,
amak ni hola ezi ninduen
nik hola eziko ditut.

Zortziko handiaren ostean zortziko txikiko lanak etorri ziren. Saio ederra burutu zuten hemen ere gure txapeldun Ekhinobitxek eta Amets Arzallus txapeldunak. Apartamendu berean bizi diren bi lagunen paperetik kantatu zuten; Amets azken hilabete honetan hirugarren aldiz maitale berri batekin itzulia da etxera eta Ekhinobitz aldiz azkenaldian bakarrik dago. Hona haserako bi aleak:Ekhinobitx:
Neska berriarekin
heldu zira usu,
kolekzionatzen edo
hasiak dituzu.
Pixkat ezkertiarrago
izan zaitez aizu,
behin bukatu ta gero
neri utzidazu.

Amets:
Gainera hitz egin dit
sozialista antzean,
ai zenbat maltzurkeri
duzun bihotzean.
Nik beti han uzten dut
ohean ertzean,
baina lo egoten zara
ni etxeratzean.

Ondoren puntu erantzunak etorri ziren. Orokorrean ez zait iruditzen gehiegi asmatu zutenik bertsolariek, baina ez ziren jardun horren gaixki ere. Hona Ekhinobitxen lana.

Hamarreko txikia gero, hamarreko txikia oltzan eta aguantatu ezineko parreak gure inguruan. Zergatik? Esplikatzen erreza… Gure ondoko lagun bati buru gainera zerbeza baso oso bat erori zitzaiolako goiko harmailetatik eta gotik behera blai egin zelako, en fin… Hona ikuskizun hori eta hamarreko txikiko beste saio apart bat, Ekhinobitxek eta Sustraiek burutakoa hain zuzen ere. Honela zioen gaiak: “Ekhi gobernuz kanpoko erakunde batean lan egiten duen bolondresa da eta gerlatik bueltan dator, Sustrai aldiz gerlara doan soldadua da. Aireportu batean egin dute topo”. Saio honetan aipagarria izan zen benetan Sustrairen asken bertsoa:Ekhi enaiz hasiko
ederra itsusten,
gu ez pentsatzekotan
trebatu gintuzten.
Alperrik nabil zure
ametsak zapuzten,
zure aurrejuzkuek
ez dizute uzten
uniformeaz gaindi
pertsona ikusten.

Kartzelakoa zetorren ondoren. Bertsolariak kartzelara eta harmailetan baloraziorako ordua. Hona Hooliganen ahotik entzun ahal izan genuen aitorpenetako bat “Damutzen nauk Ekhi azkena eman izanaz (porran)”.Kartzelako lana binaka burutu zuten bertsolariek. Lehenik 6 puntuko txikian ofizioka, bertan, haurdun geratu den 16 urteko alabaren eta bere amaren paperean jarri zituzten bertsolariak. Bertsoaldi ederrak entzun ahal izan genituen. Horien artean Ekhinobitxek botatako aleak (sentitzen dugu baina argazki kamarari bateria bukatu zitzaion) eta Ametsek eta Sustraik burututakoa. Ondoren, gai baten inguruan 3 bertso bota behar izan zituzten; lehengoek ohikoa den bezala Larrun mendira igo eta ortzimugara begira dagoen pertsona baten larrutik kantatu zuten eta bigarrenek bidaia luze baten ondoren helmugara ailegatu den gutun baten paperetik (gazteleraz esaten den bezela “nunca mejor dicho”). Bigarren hau egokitu zitzaion Ekhinobitxi eta bertso hauek bota zituen:

Nahiz ezin naizen mugitu eta
nahiz ta ezin naizen mintza
ni egin naute bi pertsonaren
lotura lortzeko giltza
ni heldu naizen lekuan dena
dago beltza eta hitsa
azkenaldian kontuak beti
asko okertzen dabiltza
nahiz ta saiatu errespetatzen
nere idazlearen hitza
askoz ere nahiago nuen
sortu izan ez banitza.

Azkenaldian aski lurralde
urrunetan naiz egona
ta maleruski ez dut ekartzen
nik honantza zoriona
nere idazleek enaute egin
oso idazki sakona
ustez bi hitzez egina dute
aldi hontan gutun ona
ni naiz gutuna hiru astetan
iritsia dena hona
ta irakurtzen duenai bizitza
izorratuko diona.

Miz anderea zure senarra
orain ez dago hobeto
lanak baditu hark jasotako
tiro hori sendatzeko
ta hemen Iraken egonen denik
bate ez dugu usteko
garaia heldu da bere eguna
orain kondatzen hasteko
ta ni zugana heldu naiz baina
hemen enago hobeto
ze patua sortu beharra heriotz
baten berri emateko.

Esan beharra dago ez zela Ekhinobitxen ariketarik borobilena izan, azken poto honek posturen bat behera egitea eragingo baitzion ziurrenik. Hala ere bertso hauekin Ekhinobitxek final paregabe bati amaiera eman zion.

Puntuaketen aurretik azken agurren txanda etorri zen. Niri Ametsen agurra gustatu zitzaidan ikaragarri. Kartzelan ordu eta erdi luze zain egon zirela eta honako bertsoa bota zuen:Sartu gaituzte kartzelatxoan,
lau metro kuadro kabida,
ta zenbakia noizko iritsi
zazpira eta zortzira,
ordulariak eman dizkigu
nik ez dakit zenbat jira,
ordu terdi bat sufrimenduan
ta pentsatu dut begira:
urte pila bat daramatenak
nola egongo ote dira…

Bukaeran sari banaketa eta txaloak. Xanti Iparragirrek jantzi zion Ametsi txapela eta baita bertso grazioso eder bat bota ere. Ametsek duela gutxi zendu zen bere amonari eskeini zion txapela. Hona bi bertsoak:

Xanti:
Garai bateko amets urruna
iada gara bertaratu
hazi txikitik landare eder
orain oihan bilakatu
oihan hortako izarra amets
nere zorionak hartu
txapel bana denek merezi zuten
krisian gaude barkatu

Amets:
Presoak, Xanti, lagun guztiak,
denak kabituak daude,
baina ezin naiz urrutira joan
Zumaian gelditu gabe.
Berak bertsoaz gutxi zekien,
zoriontsu zen señale.
Plazan Luisitak esango zion:
atzo zuen amets bale!
Ta Xabinitak: Maialeneke
bota dik makina ale!
Eta amona ibiliko zen
gustora kalerik kale,
bihar plazara jaitsiko zara
haizea bezain xuabe,
esan lagunei egin zarela
txapel txiki baten jabe.

Ondoren final osteko balorazioak, afaria, trago batzuk, parranda eta beste hainbat ixtori geuretzat gordetzeitugunak… Eguneko argazkiak ikusi nahi badituzue klik hemen.

Besterik ez, ondo izan ta aupa Ekhinobitx!!!!!

Xagua

Aupa Ekhinobitx!

bertsokatea — Thu, 13 Nov 2008 13:05:52 +0000

Bertsokateak etzi zita du
jarri zazue arreta,
ze kide batek iparraldeko
txapela baitu gordeta.
Animo Ekhi lasai joan hadi
eta animoz beteta
Seuru sayo txukun-txukuna
egingo dekela eta.

Nerbioso xamar dagola ziur,
hala izaten da beti.
Etzan egongo txapela bere
buruan dela baleki…
Animo oihu berezi bila
idatzi hau det ireki,
orain dezute aukera eta
harritu zazute Ekhi!

Xagua

Bizitza

bertsokatea — Mon, 10 Nov 2008 18:47:20 +0000

Nahiz ez gaur ta ez sekula
hontaz ez jakin nahikoa,
ausardiaz bizitzari
bertsoak naiz jartzekoa.
Zerbait erreala ote?
Edo zerbait abstraktoa?
Inork inoiz irabazten
jakingo ez dun jokoa?
Ergel batek kontautako
ipuin zentzugabekoa?
Biharko planak egiten
zaudela pasatakoa?
Gauza bat argi det behintzat,
neroni naiz lekukoa…
bizitza magia dela
ta maitasuna trukoa.

Zientziak dio dela
aminoazido, zelula,
proteina, organulu,
organo, quark, partikula,
elektroi, protoi ta neutroi,
atomo ta molekula,
ta abar luze batekin
osatutako formula.
Nik uste det kumuneko
paperaren antza dula:
hasieran lasai-lasai
zertan neurtu ta kalkula?
Baña iya ohartu gabe
bukatzen joaten zaigula
ta gutxi falta denean
apreziatzen degula.

Bizitza ta heriotza
eskutikan doazela
zein zaila den onartzea
nahiz jakin horrela dela.
Izane hil ta gero zer?
Ezereza zein krudela…
Sarri pentsatzen det hortan
ohera sartu ta bela,
baina almoadak ordun
erantzuten dit horrela:
bizitzak heriotzaren
oporraldiak direla.
Beraz bukatu aurretik
gozatu behar den bezela,
hiltzean pentsa dezagun
merezi izan zuela.

Xagua

Ximun Cazaubon

bertsokatea — Fri, 31 Oct 2008 18:24:41 +0000

Ximun Cazaubon Jatsuarra da, 16 urte ditu eta Iazko Iparraldeko eskolarteko txapelketan 2.en gelditu zen. Maialen Akizuri Xaguak eginiko elkarrizketaren ondotik hurrengoa izango zela erabaki zen; hona hemen bera hobeki ezagutzeko parada.

Noiz hasi zinen bertsotan?
-Bertsotan hasi nintzen 9 urterekin Uztaritzen

-Zergatik hasi zinen?
Aintzineko urtean Bertsolari Ttiki-ra joan ginen finalaren ikustera, eta bertsulariek egiten zutenaz kurios nintzenez, bertsu eskolan sartu nintzen

-Zerk ematen dizu segitzeko gogoa?
Bertso eskolan dugun giroak ematen dit segitzeko gogoa, bestalde, ttipitatik izan dut txapel bat lortzeko nahikaria, baina oraindik lortu ez dudanez…

-Inoiz ukan duzu gelditzeko asmorik?
Orain arte ezagutu dudan giro onarekin, ez dut nehoiz gelditzeko asmorik izan, nahiz eta batzutan horri pentsatu

-Nola definituko zenuke zure bertsu eskola?
Lagun artean, giro onean, lan egiteko aproposa

-Eta Karlos?
Ttipitatik traumatisatu nauen erruki gabeko diktadore krudela. Baina ez nuen gaur egun dudan maila lortuko ez banu bere metodo zorrotzekin ikasi

-Bada bertsolari bat idolo gisa ikusten duzuna?
Ez dut baitezpada bat gehien gustatzen zaidana, bertsulari ainitz preziatzen ditut. Hala nola Sebastian Lizaso, Unai Iturriaga, Amets Arzallus…

-Nola ikusten duzu gaur egun Lapurdi, Baxe Nafarroa eta Xiberoan bertsularitzaren egoera?
Karlos Aizpurua etorri denetik bertso erakasle gisa, gorakadan egon da hemengo bertsularitza, baina ohartzen naiz gure belaunaldiaren ondotik guttik segitzen dutela kolegioan sartzean, eta domaia da

-Zer falta zaio Ipar Euskal Herriko bertsolaritzari?
Erregularki jokatu ahal izango dugun Lapurdi, Baxe Nafarro eta Xiberuako xapelketa nagusia, aurten lehen aldikotz antolatua dena

-Aurten lehen txapelketa izango da. Nola ikusten duzu? Faboritorik bai?
Begiekin !!… Pentstzen dut etorkizun ona duela xapelketak, gainera ondoko aldian 6 gehiago baldin bagiran oraino hobeki. Bestalde, faboritoa, nahi ta nahi ez, Amets da

-Finalerako 8kotea asmatzen ausartuko zinake?
Badakizu untsa sobera berant dela horrentzat Bestenaz, nik eman nituen Sustrai, Amets, Maddalen, Patxi, Mizel, Odei, Miren eta Karlos barkatu zu ez emaiteagatik

-16 urte dituzu aurten, txapelketan parte hartzeko gazteegi…
Boh, zernahi gisaz, paritu den bezala, parte hartzeko aukera izanen dut, eta eegia erran berantetsi zait

-Bizkaiko txapelketa ere izango da momentu berdinean, segituko duzu?
Pixka bat segitzen dut, egunkarian irakurriz edo interneten ibiliz

-Nola ikusten duzu zure geroa bertsolari gisa?
Ez dut pentsatzen bertsolaritzaren bidez nere bizia irabazten ahalko dudanik, baina praktikatzen segituko dut

-Nori egingo zenioke elkarrizketa hau?
Elkarrizketa hau bertso eskolako kide guzier eginen nieke

-Bukatzeko erran nahi duzuna.
…

MOTZEAN

1.- Zein hiru adjektiborekin definituko zenuke zure burua?
Gormanta, alaia eta pizua (batzutan)
2.- Ze izan nahi zenuke haunditan?
Ez dakit bate
3.- Bizitzako egun politena?
Egunero bizitzen duguna
4.- Gustuko duzun esaldi bat?
Batzuk jaten dute bizi ahal izateko, ni bizi naiz jan ahal izateko
5.- Maniaren bat edo aitortu daiteken bizioren bat?
Pfff… Hori zuk atxemanen duzu
6.- Gustokoen duzun kantua?
« Eh Txo ! »
7.- Erraitea asko kostatzen zaizun zerbait?
Erraitea kostatzen bazait, ez dizut erranen
8.- Nun gordetzen dituzu besteek (gurasoek adibidez) ikustea nahi ez dituzun gauzak?
Ez dut ezer gordetu beharrik
9.- Zein da zure gelatik gehien gustatzen zaizun objektua?
Ohea
10.- Gustukoen duzun marraki biziduna?
« The Simpsons »
11.- Printzesarik?
Eta zuk ?

ERRIMATUZ:
-Bertsua : euskal kulturaren sua
-Neskak : bizi osorako kezkak
-Txapela : ezin ukana, ze destinu krudela !
-Ama : nerekin badu lana !
-Rugbia : nere izaeraren erdia
-Aviron : hain talde ederrik ez dut ikusi iñon
-Ximun :Arma, tiro, pun !
-Karlos : Ez da iduri duen bezain hotz

Ximun baino hoberik
ba al da bertsotan?
Atxemanen dituzu
hobeak denetan
Nahiz eta aski untsa
kantatu batzutan
Xapel beltzik buruan
ez dut oino ukan

Txanpona eta itsas-maila

bertsokatea — Fri, 31 Oct 2008 12:46:34 +0000

Pirata batek ondokoari
txanpona bat diyo kendu,
gero barkoko brankara joan ta
itxasora botatzen du.
Hori jakinda orain galdera
nahi nizueke zuzendu:
itsas-mailak zer eingo ote du
igo, jaitsi edo mantendu?
(Zergatia nabarmendu…).

Xagua

Independentzia eguna Hernanin

bertsokatea — Tue, 28 Oct 2008 21:37:42 +0000

Ostiraletik larunbatera
salto batez naiz pasako,
larunbatian Hernanin egun
señalatua zalako.
Eran, kantatu, eran, dantzatu,
eran, korri, eran, salto,…
Denetik pixkat egin genuen
beraz kontatu beharko.

Goizez (eguardiz) bertso poteo
batez hasi zan eguna,
arratsaldean sokatira ta
bizpahiru trago hurruna,
8ak alden berriz manifa,
hasera baten txukuna;
baina, ez da hain zaila asmatzen
gero pasa zitzaiguna…

Iada 10ak ken 7 ziran
joan ziranian etxera;
beraz, lasaitu eta berriro
joan giñen txosnen aldera.
Badakizue, betiko gisan
pasa zan hortik aurrera:
gure animoak gora joan ziran;
zerbeza katxiak behera…

Kontzertuetan tximuan pare
moitu ostian gorputza,
gure ustetan allatze giñan
baña zakurraren putza,
nola liteke… gu gabe joan zen
4retako autobusa;
ta azkenian 7k aldian
iritsi giñan Zarautza.

Bertsokateko askok joateko
egin genuen modua,
testimoniyo bat ere badet
ta zuentzako hor dua:

Hara Hooligan, Kzbl jauna,
aMA1a eta Xagua
(ta konpañiya Urruzunoko
pareja parranderua).

d.e: aMA1a, ez jartzeko ez bazenian esango akaso enun jarriko, baño bakizu, debekatzian tentaziyua sortzea ta…

d.e.2: Argazkiya handiyan ikusteko klik in gañian. Kalitatiai dagokiyonez kulpak Kzbl-ei (bere mobilakin ateatakua da) eo argazkilayai (Urruzunoko beste parrandazale bat); kasu hontan Xaguak eztaka kulpaik harritzekua bare jejeje…

Xagua

Gaxtiak Vs Xaharrak desapiyua

bertsokatea — Sun, 26 Oct 2008 18:26:09 +0000

Ostiralian bertso eskolan
ohorea zegon kolokan,
Motxianeko gaxte ta xaharrak
jardun baikinen erronkan,
afalaurretik paletan eta
afalostian bertsotan,
jakin gainera nagusi izan
garela aurtengo hontan.

Paletan giñan Hooligan ta ni
Vs Xabi ta Etxabe,
hasi aurretik presioakin
ez genbiltzan horren bare,
lehengo urteko akatsetatik
ikasi degu halare
ta aurten errex gailendu gera
iya izerditu gabe.

Ondoren bertso desapiyuan
egin behar gendun burruka
eta Xevillan egin genuen
nahiko buztan afalduta,
bertso eskolan guk kanturako
afiziyua degu ta
afalostia hasi genuen
bertso zaharrak kantatuta.

Xaharren taldian ziran Etxabe,
Xabi, Artzaya ta Martin,
eta gurian nola Arantzabal
etzen etorri gurekin
Hodei, Hooligan ta nik taldia
osau genun Txikiyakin,
ta garaipena gurea izan tzen
6 ta 5 emaitzarekin.

Xaharrek axkar eskatu zuten:
“alineación indevida”,
ta epaileak ipini ziren
errekurtsoai begira,
Txikiya ez dala hain gaxtia ta
onartu egin zuten tira…
baina iwal diyo hurrengo urtian
bueltak etorriko dira!!

Pikeak pike lagunartian
ibili giñan guztiyak,
ta holakotan pasa ohi dan lez
hegan egin tzun astiyak,
etxeratzeko lagundu zigun
John zaharraren abestiyak,
geyago jakin nahi badezute
hemen daude argazkiyak.

Xagua