Maitasuna landatuz…
2008 Urria 21 @ 12:03 (gogoetak)
Joan dira une garratzak,
negarrak eta beldurrak;
gaur harridura ikurrak
dira atzoko akatsak.
Ta berriz lehen urratsak
badatoz ustekabean,
sentitzen naiz azkenean
ilusioz ta primeran,
15 urtekin eran
tximeletak sabelean.
Pasatakoa aparte
utzi dut, baina nerekin
ilusio berriekin
nerbioek segi didate;
maite edo ta ez maite,
baietz dio margaritak.
Ametsak eta irrikak,
dena da plana geroko,
ea noiz egingo topo,
badatoz garai politak.
Berriz neska bat buruan,
berriz telefono deiak,
berriz poeten ideiak
oheratzeko orduan.
Garai batean moduan
ederra da bizitzea
eta ondo sentitzea.
Nahiz ez heldu helmugara,
sentsazio polita da
maitasuna landatzea.
Xagua
Anonimoa -(e)k esandakoa
Urria 21, 2008 @ 8:54 pm
Oso bertso politak Xagua! Jakin al daiteke zein den bertso hauen beste sortzailea???
Xagua -(e)k esandakoa
Urria 21, 2008 @ 9:17 pm
Eskerrikasko “Anonimoa”. Ah! Ta noski jakin leikela zein dan bertso hauen beste sortzailia, bakizu, kasualitatez zure izen berdiña daka…
Manu -(e)k esandakoa
Urria 21, 2008 @ 10:52 pm
Burua joaten denean
guregandik haratago
sentsazio on bat dago
gure irudimenean
unea datorrenean
nahiz eta ez egin kaso
arrazoia du akaso
alaitzen baitu eguna
landatzeak maitasuna…
nahi ta uztarik ez jaso
Portzierto Xagua, bertsoak hiriak ttuk ez?
Xagua -(e)k esandakoa
Urria 22, 2008 @ 12:25 pm
Neriaituk bai, kimikako fakultaten idatziyak ordu libre baten. Ikusteitenez, hike bakik zer deken hoi eh! Goatze nauk oaindik Hondarribiko festetan jejeje Bertsokaten zentsurautako bertso bakarrak dituk eun hartakuak jejeje
Bea Manu, ondo izan!
Manu -(e)k esandakoa
Urria 22, 2008 @ 2:57 pm
eeee, egia!!
eniñun oroitzen!!
Bertso hoik ondo gordiak izango ttuk ez?
Nozpaitte, zentsura garaia pasatzean jarriko dizkiyau. Biño nozpatte…
goierri69 -(e)k esandakoa
Urria 22, 2008 @ 3:18 pm
Maitasuna zer ote da,
maitepozen maitemina?
bizi bizitzeko grina
hezkontza baten bezpera
arazo denen hasera
hasieran dena eder
muxukatuz mila bider
baña denbora maltzurra
ta neskatilla makurra
mesedez beste bat ager
Ta beste bat agertu zan
beno edo da agertu
ez dut nahi sekula_agurtu
bizitzeko esperantzan
baño barruko zalantzan
bizi beharko dut beti
ai nork edo nork baleki
maitasunaren hesiak
noiz gaituen bereiziak
AMETS BERRIAK ERAIKI!!!!
Xagua -(e)k esandakoa
Urria 23, 2008 @ 5:57 pm
Muxukatuz mila bider
ezkontza baten bezperan…
maitasunean haseran
dena izaten dela eder…
Ziur enagola oker,
utzi, hasi, utzi hasi
ibiltzen zerala kasi,
argitu zaio Oierri
zergatik zeran goierri
69…
goierri69 -(e)k esandakoa
Urria 23, 2008 @ 7:37 pm
Duda bat badu Oierrek
zergaitik naizen goierri
nereganaino etorri
eta galdetu zerorrek
bertsolagun zintzo horrek
numeroz nahi nuen jantzi
ta hauxe nuen bereizi
oixe da nere gogoa
hau nere poetismoa
hirurogeitabeatzi